Қазақстан Президенті Қасым-Жомарт Тоқаев Халық қаһарманы, соғыс және еңбек ардагері Иван Гапичтің отбасына көңіл айтты.

1941 жылы өз еркімен майданға аттанған Иван Степанович байланысшы қызметін атқарды. Ол Беларусьті азат етуге қатысып, Кенигсбергке дейін жетті. Соғыстан кейін оралдық ардагер өмірін прокуратура қызметіне арнады.

Президент жеделхатында: «Иван Степанович майданға өз еркімен аттанып, байланысшы ретінде соғыстың соңына дейін қатысты. Елге оралған соң ұзақ жылдар бойы прокуратура органдарында мінсіз қызмет атқарды. Адамгершілік қағидаттарынан айнымайтын әрі өз ісінің нағыз маманы ретінде ол әріптестері мен көпшілік арасында зор абыройға ие болып, құрметке бөленді», – деп жазылған.