Қазақстанның қос ірі қаласында демалыс күндері ауа райы әртүрлі болады. Алматыда жексенбіге қарай ауа температурасы +21 градусқа дейін көтеріледі. Ал Астанада жаңбыр жауып, жексенбіге қараған түні үсік жүреді деп болжанып отыр, деп хабарлайды Oimaqnews.kz 

Жұма, 6 қарашада Астанада кешке қарай аздаған жаңбыр жауады деп күтіледі. Түнде ауа температурасы +1…+3 градус, күндіз +10…+12 градус болады. Таңертең және күндіз желдің жылдамдығы секундына 15–20 метрге дейін күшейеді.

7 қарашада түнде және күннің бірінші жартысында жаңбыр жауады деп болжанып отыр. Түнде ауа температурасы +1…+3 градус шамасында сақталса, күндіз +7…+9 градус болады.

Жексенбі, 8 қарашада күннің соңына қарай аздаған жаңбыр жаууы мүмкін. Түнде ауа температурасы −3…−5 градусқа дейін төмендейді, күндіз +7…+9 градус болады. Жел бағыты түнде батыстан солтүстік-шығысқа ауысып, жылдамдығы түнде секундына 3–8 метр, күндіз 9–14 метр болады.

Жұма, 6 қарашада Алматыда құбылмалы бұлтты ауа райы күтіледі, жауын-шашын болмайды. Түнде ауа температурасы +1…+3 градус болса, күндіз +15…+17 градусқа дейін көтеріледі.

7 қарашада қалада күн одан әрі жылынады. Түнде ауа температурасы +3…+5 градус, күндіз +17…+19 градус болады.

Демалыс күндерінің ең жылы күні жексенбі, 8 қарашаға сәйкес келеді. Бұл күні термометр бағаны +19…+21 градусқа дейін көтеріледі. Түнде +5…+7 градус болады.

Алматыда үш күн бойы жауын-шашын күтілмейді. Оңтүстік-шығыстан соғатын желдің жылдамдығы секундына 3–8 метр болады.

Бұған дейін синоптиктер алдағы күндері Қазақстанда ауа райы күрт өзгеретінін хабарлаған болатын. Антициклонның орнын солтүстік циклонның терең ойығы басып, соның салдарынан мол жауын-шашын түсіп, жел күшейіп, тұман түседі деп күтіледі.