Оның айтуынша, соңғы бес жылда еліміздегі жоғары білім беру жүйесіне бөлінетін қаржы көлемі айтарлықтай артқан. Атап айтқанда, шығындар 246 миллиард теңгеден 472 миллиард теңгеге дейін өскен. Студенттер саны 625 мың адамға жетсе, мемлекеттік білім беру тапсырысы 77 мыңнан астам грантты құраған.

Соған қарамастан, жүргізілген мемлекеттік аудит білім беру сапасы, ашықтық және нәтижелілік қаржыландыру көлемінің өсуіне сәйкес келмейтінін көрсеткен.

— Қаржыландыру екі есеге артқанына қарамастан, жүйеде сапалы өзгеріс байқалмайды. Бұл бірқатар жүйелі мәселелермен байланысты,  дейді Тілеген Каскин.

Аталған мәселелердің бірі  Болашақ бағдарламасы аясындағы әкімшілендіру. Аудит деректеріне сүйенсек, 340 үміткерге жалпы сомасы 7,7 миллиард теңге болатын стипендия министрлік шешімімен жеке тәртіпте, белгіленген талаптарға сай келмесе де тағайындалған. Бұған қоса тағы 151 стипендия бекітілген лимиттен тыс берілген. Ал жасанды интеллект бағыты бойынша жоспарланған 54 стипендияның тек 5-еуі ғана нақты берілген. Қалған 49-ы басқа бағыттарға қайта бөлінген.