Алматы облысында Қаскелең қаласындағы мешіт аумағында жасөспірімдерге қол көтеру фактісі бойынша сотқа дейінгі тергеп-тексеру басталды, деп хабарлайды Qaz365.kz өңірлік полиция департаментіне сілтеме жасап.

Құзырлы органның мәліметінше, бұған әлеуметтік желіде оқытушының шәкірттеріне соққы жасап жатқаны бейнеленген видеоның таралуы себеп болған. Тексеру жұмыстары аталған оқиғаның 2 маусым күні болғанын көрсетті.

«Кәмелетке толмағандармен және олардың ата-аналарымен қажетті іс жүргізу амалдары атқарылып жатыр. Тергеу барысы бақылауға алынды. Мұғалімнің әрекетіне заңға сәйкес құқықтық баға беріледі», – делінген ведомство хабарламасында.

Kazinform агенттігінің мәліметінше, бейнежазбадағы ер адам – Дүйсенхан Нұрберді мешіттегі оқытушы қызметінен босатылды. Ал зардап шеккен жасөспірімдердің ата-аналары полицияға ешқандай шағымы мен талабы жоқ екені туралы жазбаша арыз тапсырған.