Қытайдың солтүстік-шығысындағы Ляонин провинциясында табиғи апаттың салдарын жою жұмыстары жалғасып жатыр. Осыған байланысты елдің Мемлекеттік даму және реформалар комитеті өңірді қалпына келтіруге арналған қаржылық қолдау көлемін 30 миллион юаньға дейін ұлғайтты.

Ресми мәліметке сәйкес, бөлінген қаржы ең алдымен тасқыннан бүлінген көлік инфрақұрылымын жөндеуге, сондай-ақ мектептер мен басқа да әлеуметтік маңызы бар нысандарды қайта қалпына келтіруге бағытталады. Билік бұл жұмыстардың тұрғындардың қалыпты өмір ырғағына тезірек оралуына мүмкіндік беретінін атап өтті.

Ляониндегі төтенше жағдайға биылғы «Бави» тайфуны себеп болды. Солтүстік бағытқа ойысқан тайфун өңірде толассыз жауын-шашын әкеліп, өзендердің тасуына және бірнеше қала мен ауданды су басуына алып келді. Табиғи апаттан әсіресе Шэньян мен Фушунь қалалары елеулі зардап шекті.

Жағдайдың күрделенуіне байланысты Қытайдың Табиғи апаттардың алдын алу және олардың зардабын азайту жөніндегі мемлекеттік комитеті өңірде төтенше әрекет етудің төртінші деңгейін жариялаған.

Соңғы күндері Қытай билігі табиғи апаттардан зардап шеккен өңірлерді қолдауға қосымша қаржы бөліп келеді. Бұған дейін орталық қордан Фуцзянь және Чжэцзян провинцияларындағы апаттық-құтқару және қалпына келтіру жұмыстарына 40 миллион юань бағытталған еді.