Мамандардың болжамынша, 9–11 мамыр аралығында ел аумағының басым бөлігінде тұрақсыз ауа райы сақталады. Атмосфералық фронттардың өтуіне байланысты жаңбыр жауып, найзағай ойнайды.

Синоптиктердің мәліметінше, 9 мамырда елдің солтүстік, солтүстік-батыс және оңтүстік-батыс аймақтарында қатты жаңбыр күтіледі. Ал 10–11 мамыр күндері шығыс, оңтүстік және оңтүстік-шығыс өңірлерде нөсер жаууы ықтимал.

Кей жерлерде бұршақ түсіп, жел күшейеді. Оңтүстік аймақтарда шаңды дауыл болжанып отыр. Сондай-ақ түнгі және таңертеңгі уақытта тұман түсуі мүмкін.

Алдағы күндері ауа температурасы біртіндеп төмендейді. Күндіз батыста +13…+28 градус, солтүстік-батыста +10…+18 градус, солтүстікте +5…+13 градус болады деп күтіледі.

Орталық және шығыс өңірлерде ауа температурасы +8…+18 градус шамасында сақталса, оңтүстікте +17…+26 градусқа дейін жетеді. Оңтүстік-шығыста +15…+22 градус, таулы аймақтарда +8…+13 градус жылы болады деп болжанып отыр.