Астана қалалық полиция департаментінің мәліметінше, бұған дейін сотталған Ермек Нарымбайды полиция қызметкерлері ұстаған. 

"Тергеу нұсқасына сәйкес, ол соттың заңды күшіне енген үкімін және қоғамдық-саяси қызметпен айналысуға салынған тыйымды біле тұра, әдейі әрі бірнеше рет заңсыз әрі арандатушылық сипаттағы материалдарды таратып, азаматтарды жаңылыстырған", – делінген хабарламада.

Құқық қорғау органдары әрекеттердің жүйелі және саналы түрде жасалғанын, сондай-ақ сот шешімін тікелей орындамағанын атап өтті.

Полиция департаментінің дерегінше, бұған дейін ол сот шешімін орындамағаны үшін бес рет әкімшілік жауапқа тартылған. Осыған байланысты оған қатысты қылмыстық іс қозғалған. Ұсталған азамат уақытша ұстау изоляторына қамалды. Сот шешімімен оған қамауда ұстау түріндегі бұлтартпау шарасы қолданылған. Тергеу жалғасып жатыр.