Қазақстанда зейнетақы жинақтарын емделуге пайдалану уақытша тоқтатылды. Бұл туралы Отбасы банк ресми сайтында жарияланды, деп хабарлайды Oimaqnews.kz 

Банк мәліметінше, 2026 жылғы 12 қаңтар күні сағат 19:00-ден бастап enpf-otbasy.kz платформасында біржолғы зейнетақы төлемдері (БЗТ) есебінен емделуге арналған өтінімдерді қабылдау уақытша тоқтатылады.

Хабарламада көрсетілгендей, Отбасы банк Денсаулық сақтау министрлігі және өзге де мүдделі мемлекеттік органдармен бірлесіп, зейнетақы жинағы есебінен медициналық қызметтер алу талаптарын қайта қарайды. Сондай-ақ ақпараттық жүйелерді біріктіру тетіктері пысықталып, зейнетақы қаражатының мақсатсыз пайдаланылуына жол бермеу көзделіп отыр.

Емделуге арналған өтінімдерді қабылдау талаптарды түзету жұмыстары толық аяқталғаннан кейін қайта жандандырылады. Бұл туралы қосымша ақпарат берілетіні атап өтілді.