Ұлттық статистика бюросының деректеріне сүйенсек, 2025 жылғы тамызда жаңа тұрғын үйдің бір шаршы метрінің орташа бағасы ₸538 534 құрады. Екінші нарықта – ₸558 533, ал жалдау құны – ₸4 620.

Бір жыл ішінде (2024 жылғы тамыздан 2025 жылғы тамызға дейін) жаңа тұрғын үйдің бағасы 11,3%-ға, екінші нарықтағы баға 8,8%-ға, жалдау ақысы 8,5%-ға өсті.

Өңірлер арасында бастапқа нарықтағы баға Павлодар (+25,8%), Қызылорда (+15,3%), Алматы (+15,3%) және Шымкент (+14,8%) қалаларында айтарлықтай қымбаттаған. Екінші нарықта баспана бағасы Ақтөбе (+20,2%), Павлодар (+17,8%) және Алматы (+16,6%) қалаларында қатты өсті. Ал жалдау ақысы ең көп Ақтөбе (+43,5%), Көкшетау (+21%) және Жезқазған (+20,2%) қалаларында көтерілген.

Жалпы, 2025 жылғы тамызда Қазақстанда 41 380 тұрғын үйді сатып алу-сату жөнінде келісім жасалған. Оның ішінде 8 527-сі – жеке үйлерге, 32 853-і – көпқабатты үйдегі пәтерлерге тиесілі. Бұл 2025 жылғы шілдемен салыстырғанда 4,1%-ға және 2024 жылғы тамызбен салыстырғанда 1,3%-ға көп.

Мәмілелер саны бойынша көшбасшылар – Астана (9 457 мәміле) мен Алматы (8 402), сондай-ақ Қарағанды облысы (2 923). Ең аз мәміле Ұлытау облысында тіркелген (283).