Ұлттық статистика бюросының мәліметіне сәйкес, әлеуметтік маңызы бар азық-түлік тауарларының жылдық бағасы 2,4 пайызға ғана өскен. Былтыр осы кезеңде бұл көрсеткіш 9,4 пайыз болған. Яғни бір жыл ішінде бағаның өсу қарқыны шамамен төрт есеге баяулаған.

Жыл басынан бері әлеуметтік маңызы бар азық-түлік небәрі 1,7 пайызға қымбаттады. Ал шілде айында жалпы баға 0,3 пайызға төмендесе, соңғы аптада тағы 0,1 пайызға арзандаған.

Соған қарамастан, барлық өнімнің бағасы тұрақтады деуге келмейді. Кейбір азық-түлік түрлері әлі де қымбаттап жатыр. Әсіресе ет өнімдеріндегі өсім жоғары.

Соңғы бір жылда қой етінің бағасы республика бойынша орта есеппен 27,7 пайызға көтерілген. Сүйекті сиыр еті 15,6 пайызға, тартылған ет 15,3 пайызға қымбаттаған. Сондай-ақ тауықтың сан еті, жұмыртқа, сары май, тұз, сүйексіз сиыр еті мен жылқы еті де өткен жылмен салыстырғанда айтарлықтай қымбаттаған өнімдердің қатарында.

Өңірлер бойынша да айырмашылық бар. Қой етінің бағасы Оралда 48,8 пайызға, Қызылордада 47,2 пайызға, Семейде 45 пайызға, ал Астанада 40,5 пайызға өскен. Сүйекті сиыр еті ең көп Тараз қаласында қымбаттап, бір жылда 33,3 пайызға көтерілген.

Сарапшылардың айтуынша, жалпы инфляцияның бәсеңдеуі азық-түлік нарығындағы жағдайдың тұрақтала бастағанын көрсетеді. Алайда күнделікті сұранысқа ие өнімдердің бір бөлігінде баға өсімі әлі де сақталып отыр. Сондықтан тұтынушылардың қымбатшылықты бұрынғыдай сезінуі заңды құбылыс.

Мамандар алдағы айларда маусымдық көкөністердің нарыққа көбірек шығуы азық-түлік бағасына оң әсер етуі мүмкін екенін айтады. Дегенмен ет өнімдерінің құны бұрынғысынша инфляцияға ықпал ететін негізгі факторлардың бірі болып қала береді.