Қадағалау органының мәліметінше, марқұм Сұлтан Сәрсемәлиевтің азаматтық жұбайы Ақбаян Мұқанғалиева әлі де дәрігерлердің бақылауында, деп хабарлады Orda сайтына сілтеме жасап Oimaqnews.kz. Ол бұған дейін Алматы қаласындағы медициналық мекемеге стационарлық сот-психологиялық және психиатриялық сараптамадан өту үшін жіберілген болатын.

Прокуратураның хабарлауынша, кешенді сот-психологиялық-психиатриялық сараптама қорытындысына сәйкес, Ақбаян Мұқанғалиеваға динамикалық бақылау мен қосымша диагностикалық зерттеулер қажет.

Сонымен қатар, ведомство 27 сәуірде Мұқанғалиеваға қатысты Қылмыстық кодекстің 99-бабы 2-бөлігі 1-тармағы («Адам өлтіру») бойынша қозғалған қылмыстық істің қылмыстық құқық бұзушылық құрамының болмауына байланысты тоқтатылғанын мәлімдеді.

«Оған төрт адамның өліміне қатысы бар деген айып тағылған жоқ. Сонымен бірге қылмыстық іс материалдарынан Қылмыстық кодекстің 434-бабы («Қылмыс туралы хабарламау») белгілері бойынша жеке іс жүргізу бөлініп шығарылды», – деп хабарлады прокуратура.

Қадағалау органы өкілдерінің айтуынша, қазіргі уақытта Ақбаян Мұқанғалиеваның әрекеттеріне түпкілікті құқықтық баға берілген жоқ. Сондай-ақ оған қатысты бұлтартпау шарасы да таңдалмаған.

Еске салайық, Жаңгелдин ауылындағы қайғылы оқиға қоғамда үлкен резонанс тудырған болатын. Қазір аталған іс бойынша тергеу жалғасып жатыр.