Қазақстан мұсылмандары діни басқармасының төрағасы, Бас мүфти Наурызбай қажы Тағанұлы отандық кәсіпкерлерді Құрбан айт мерекесі қарсаңында мал бағасын жасанды түрде көтермеуге шақырды, деп хабарлайды Oimaqnews.kz 

Астанада өткен баспасөз мәслихатында Діни басқарма басшысы бұл мейрамның тек діни шара емес, сонымен қатар елдегі бірлік пен ынтымақтың, мейірімділіктің көрінісі екенін атап өтті.

Бас мүфти өз үндеуінде бизнес өкілдерін халықтың әлеуметтік жағдайын ескере отырып, мал саудасында оңтайлы баға ұсынуға, сондай-ақ күнделікті тұтынатын азық-түлік өнімдеріне барынша жеңілдіктер жасауға үгіттеді. Сонымен қатар, ол мереке күндері еліміздің әртүрлі аймақтарында қайырымдылық және мәдени іс-шаралар өтетінін жеткізді. Мереке аясында мешіттердің жанына киіз үйлер тігіліп, ұлттық ойындар мен рухани кештер ұйымдастырылмақ.

Н. Тағанұлы барша сенушілерге айт мейрамын ұлттық киіммен қарсы алуды және ата-баба дәстүрі мен ауызбіршілік атмосферасын сақтау үшін жоспарланған шараларға белсенді қатысуды ұсынды. Мамандардың мәліметінше, жыл сайын Құрбан айт қарсаңында еліміздің мал базарларында сұраныстың артуына байланысты бағаның құбылуы жиі байқалады, бұл Діни басқарма тарапынан осындай дәстүрлі үндеулердің жасалуына негізгі себеп болып отыр.