Қазақстанда Мемлекеттік кірістер комитеті (МКК) өзін-өзі жұмыспен қамтыған азаматтардың тіркелу заңдылығын жаппай талдауды қолға алды. Бұған кейбір компанияның салық жүктемесін азайту мақсатында өз қызметкерлерін штаттан шығарып, оларды жеке кәсіпкер немесе өзін-өзі жұмыспен қамтушы ретінде қайта тіркетіп қоюы себеп болған, деп хабарлайды Oimaqnews.kz 

МКК өкілі Ерқанат Шынбергеннің түсіндіруінше, штаттағы жұмысшы мен өзін-өзі жұмыспен қамтыған адамның төлейтін салығында айтарлықтай айырмашылық бар. Сондықтан ведомство іс жүзінде бұрынғы жұмысын жалғастырып, бірақ құжат жүзінде «еркін қызметкер» болып көрінетін азаматтардың жағдайын зерттеп жатыр.

«Егер адам өзін-өзі жұмыспен қамтыған болып тіркеліп, бірақ іс жүзінде бір ғана жұмыс берушіге тұрақты түрде қызмет көрсетсе, онда бұл жағдайға сұрақ туындауы мүмкін», — деп ескертті Ерқанат Шынберген.

Қазіргі уақытта ведомство тиісті талдау жұмыстарын жүргізуде. Егер салық режимін әдейі дұрыс қолданбау деректері расталса, алдағы уақытта мұндай заң бұзушылықтар үшін жауапкершілікті күшейту туралы ұсыныстар енгізілуі мүмкін.