Франциядағы қан құю орталығы (EFS) 48-қан топтамасы жүйесінің ашылғанын хабарлады. Бұл топтың иесі – Парижде тұратын, Кариб теңізіндегі Гваделупа аралынан шыққан әйел болып шықты. Жаңа қан тобына **Gwada negative** деген атау берілді. Бұл жаңалықты Халықаралық қан құю қауымдастығы (ISBT) 2025 жылдың маусым айында Миланда өткен конференцияда ресми түрде мойындады.
Сирек кездесетін бұл жағдай алғаш рет 15 жыл бұрын тіркелген. Сол кезде 54 жастағы науқастың операция алдындағы стандартты талдаулары барысында бұрын беймәлім болған антидене анықталған. Тек 2019 жылы ғана ғалымдар ДНҚ-ның жоғары өнімді тізбектелуі арқылы оның табиғатын — ерекше генетикалық мутацияны анықтай алды. Алайда бұл жаңалық енді ғана халықаралық деңгейде мойындалып, қан топтарының жаһандық тізіліміне енгізілді.
EFS медициналық биологы Терри Пейрардың айтуынша, бұл әйел сирек кездесетін қан тобын мутацияға ұшыраған ген тасымалдаушы болған ата-анасынан мұра етіп алған. Ғалымның айтуынша, бұл науқас — дәл осындай қан тобына ие екені белгілі жалғыз адам және донор ретінде тек өзі ғана өзіне сәйкес келеді.
Енді зерттеушілер бұл сирек қан тобына ие басқа адамдарды табуға үміттеніп отыр, бұл өз кезегінде ерекше қан топтары бар науқастарға медициналық көмек көрсету сапасын жақсартуға мүмкіндік береді. EFS мәліметінше, заманауи ДНҚ талдау әдістері жаңа жүйелердің ашылу үдерісін жеделдеткен, ал бұл сирек жағдайларда сәйкес донорларды табу мүмкіндігін арттырады.
Бұған дейін жапон ғалымдары барлық қан топтарына сәйкес келетін әмбебап қан жасап шығарған болатын.
Автор
Оймақ
Қазақстан және шетел ақпараттарын тарататын, түрлі оқиғаларға мамандар көзқарасы мен арнайы сараптама ұсынатын медиа құралы – Oimaqnews.kz. Ойлана білгенге оймақтай ойдың да берері мол.
Ұқсас жаңалықтар
