Түркістан қаласындағы желілік саябақ пен ботаникалық бақта лотос гүлдері жайқалып өсіп тұр. Күндіз гүл ашып, кешкісін жабылып қалатын ерекше гүлді қызықтап тамашалаушылар да көп. Әсіресе, шеттен келген туристер таңсық дүниенің жанында суретке түсіп, желіге жүктеп жатыр. Бір айта кетерлігі, су бетінде қалқып жүретін өсімдік айрықша күтімді қажет етпейді. Тек айналасын уақытылы қоқыстан тазартып отырса жеткілікті.

«Түркістанда лотостың «тұңғиық» деп аталатын түрі өсіп жатыр. Ол маусым айынан қыркүйек айына дейін гүлдейді. Гүлі су бетінде қалқып жүргендей әсер береді. Негізінен тұқым арқылы және тамыры арқылы көбеюде. Түркістан қаласына 2019 жылы жеткізілді. Қазір Б.Саттарханов даңғылындағы желілік саябақтың 600 шаршы метрінде және Әзірет Сұлтан ботаникалық бағының 300 шаршы метр аумағында өсіп тұр», - деді «Жасыл Түркістан» КММ директор орынбасары Ербол Қайырбеков.