Қазақстан Республикасының Президенті Қасым-Жомарт Тоқаев Корея Республикасының Президенті Ли Чжэ Мёңнің шақыруымен бұл елге мемлекеттік сапармен барды, деп хабарлайды  Ақорданың баспасөз қызметі.

Мемлекет басшысын Сеулдің халықаралық әуежайында Корея Республикасы Премьер-министрінің орынбасары – Ғылым және ақпараттық-коммуникациялық технологиялар министрі Пэ Гён Хун және басқа да ресми тұлғалар күтіп алды.

Сапар аясында Сеулде жоғары деңгейдегі екіжақты келіссөздер өтіп, тараптар қазақ-корей кеңейтілген стратегиялық серіктестігін одан әрі нығайту перспективаларын талқылайды. Бұдан бөлек, Президент Кореяның ірі компаниялары жетекшілерімен кездесіп, екі ел арасындағы сауда-экономикалық және инвестициялық ынтымақтастықты тереңдету мәселелерін қарастырады.

Айта кетейік, Мемлекет басшысының осы сапары аясында Сеулде «Орталық Азия – Корея Республикасы» бірінші саммитін өткізу де жоспарланған. Бұған дейін Қасым-Жомарт Тоқаев БРИКС саммитіне қатысу үшін Үндістанда жұмыс сапарымен болған еді.