«Қазгидромет» 23 шілдеге арналған ауа райы болжамын жариялап, еліміздің барлық өңіріне дерлік дауылды ескерту жасады.

Синоптиктердің мәліметінше, елдің солтүстігі, шығысы, орталығы, сондай-ақ оңтүстік пен оңтүстік-шығыстың таулы өңірлерінде нөсер жаңбыр жауып, найзағай ойнайды. Кей жерлерде бұршақ түсіп, желдің екпіні секундына 25–28 метрге дейін күшеюі мүмкін. Оңтүстік өңірлерде шаңды дауыл күтіледі.

Елордада күндіз жаңбыр жауып, найзағай ойнайды, бұршақ түсуі ықтимал. Ауа температурасы түнде +13…+15 градус, күндіз +23…+25 градус болады.

Алматыда өткінші жаңбыр мен найзағай күтіледі. Қалада желдің екпіні секундына 15 метрге дейін күшейеді. Таулы аймақтарда нөсер жаңбыр, бұршақ және екпіні 25 метрге дейін жететін жел болжанған. Сонымен қатар қалада төтенше өрт қаупі сақталып отыр.

Шымкентте де жаңбыр жауып, найзағай болады. Солтүстік-батыстан соғатын желдің екпіні секундына 15–20 метрге дейін жетуі мүмкін. Қала аумағында төтенше өрт қаупі де сақталады.

Аптап ыстық батыс өңірлерде жалғасады. Атырау облысында күндіз ауа температурасы +35…+39 градусқа дейін көтерілсе, Маңғыстауда +38…+40 градусқа дейін ысиды. Ақтөбе мен Батыс Қазақстан облыстарының кей аудандарында да ауа температурасы +35…+38 градусқа дейін жетеді.

Алматы, Жетісу, Абай және Шығыс Қазақстан облыстарының таулы аудандарында 23–25 шілде аралығында қатты жауын-шашын салдарынан өзендердегі су деңгейі көтерілуі мүмкін. Мамандар бұл өңірлерде беткейлік ағын қалыптасып, сел жүру қаупі бар екенін ескертеді.

Бұдан бөлек, Ақмола, Қостанай, Павлодар, Қарағанды, Солтүстік Қазақстан, Жамбыл, Түркістан, Ұлытау және басқа да бірқатар өңірде найзағай, бұршақ, екпінді жел және жоғары немесе төтенше өрт қаупі сақталады.

Мамандар тұрғындарға дауылды ескертулерді ескеріп, ауа райының қолайсыз жағдайында алыс жолға шықпауға, таулы өңірлерде сақ болуға және өрт қауіпсіздігі талаптарын қатаң сақтауға кеңес береді.