Қазақстан Ішкі істер министрлігі бұрынғы ұлттық экономика министрі Қуандық Бишімбаевқа, Ұлттық қауіпсіздік комитетінің бұрынғы төрағасы Кәрім Мәсімовке және қоғам белсендісі Перизат Қайратқа рақымшылық жасау мәселесі қарастырылмайтынын мәлімдеді, деп хабарлайды Oimaqnews.kz Arasha.kz.сайтына сілтеме жасап.

ІІМ министрінің орынбасары Санжан Әділовтың айтуынша, қолданыстағы заңнамаға сәйкес мұндай санаттағы сотталғандарға амнистия қолдануға тыйым салынған.

«Қылмыстық кодекстің 78-бабына сәйкес терроризм, экстремизм, мемлекетке опасыздық жасау, сыбайлас жемқорлық қылмыстары немесе қылмыстық топ құрамында жасалған құқық бұзушылықтар үшін сотталған адамдар рақымшылыққа іліге алмайды. Сондықтан бұл тұлғаларға рақымшылық жасау мәселесі ешбір жағдайда көтерілген жоқ және көтерілмейді», – деді Санжан Әділов.

Еске салайық, Қуандық Бишімбаев жұбайы Салтанат Нүкенованы аса қатыгездікпен өлтірді деп танылып, сот үкімімен 24 жылға бас бостандығынан айырылған болатын.

Ал ҰҚК-нің бұрынғы төрағасы Кәрім Мәсімов 2022 жылғы Қаңтар оқиғасынан кейін мемлекетке опасыздық жасау, билікті күшпен басып алуға әрекеттену және қызметтік өкілеттіктерін асыра пайдалану баптары бойынша кінәлі деп танылып, 18 жылға сотталған.

Перизат Қайратқа қатысты тергеу мен сот процестері қоғамда кең талқыланып келеді. Осыған байланысты оның ықтимал рақымшылыққа ілігу мәселесі де әлеуметтік желілерде жиі көтерілген болатын.

ІІМ өкілдері амнистия тек заңда көрсетілген талаптарға сай келетін азаматтарға ғана қолданылатынын және ауыр әрі ерекше санаттағы қылмыстар үшін сотталған адамдарға бұл норма жүрмейтінін атап өтті.