Қазақстанда сайлау науқаны кезінде саяси партиялар мен кандидаттарды әлеуметтік желілерде тегін қолдаған блогерлер мен қолданушыларға айыппұл салынуы мүмкін. Бұл туралы Мәжілістегі заң жобасын талқылау кезінде Орталық сайлау комиссиясының (ОСК) хатшысы Шавхат Өтемісов мәлімдеді, деп хабарлайды Oimaqnews.kz Qaz365.kz. сайтына сілтеме жасап. 

ОСК өкілінің түсіндіруінше, егер блогер мен кандидат немесе партия арасында ресми келісімшарт болмаса, онда жарияланған кез келген қолдау мазмұнындағы контент «жасырын үгіт-насихат» деп танылады. Атап айтқанда, партиялық нышандарды қолдану, логотипі бар киіммен суретке немесе видеоға түсу, сондай-ақ кандидаттарды келісімсіз тегін жарнамалау заңсыз әрекет қатарына жатқызылуы ықтимал.

Бұл мәселе депутат Никита Шаталовтың блогерлердің ерікті түрде жариялайтын материалдарына қатысты қойған сауалынан кейін көтерілді. Депутат мұндай әрекеттердің сайлау науқанының шығындары мен есептілігіне қалай әсер ететінін нақтылауды сұрады. Шавхат Өтемісов жазбаша келісім болмаған жағдайда, Әкімшілік құқық бұзушылық туралы кодекстің (ӘҚБтК) 118-бабы бойынша жауапкершілік қарастырылғанын атап өтті.

Анықтама ретінде айта кетсек, ӘҚБтК-нің 118-бабы бойынша кандидаттарға немесе партияларға олардың жазбаша келісімінсіз қызмет көрсеткені үшін жеке тұлғаларға 20 АЕК (шамамен 86 500 теңге) көлемінде айыппұл салынады. Заңды тұлғалар мен бизнес нысандары үшін айыппұл мөлшері бұдан да жоғары болады. Бұл шара сайлау процесінің ашықтығын қамтамасыз етуге және қаржылық есептіліктен тыс үгіт-насихат жұмыстарын шектеуге бағытталған.