Сот анықтағандай, қылмыс отбасының үйінде, туыстары қыздың жетінші туған күнін атап өтуге жиналған күні болған. Тергеу деректеріне сәйкес, дәл сол туыстары ер адамды қылмыс үстінде ұстап, бірден құқық қорғау органдарына хабарлаған.

Айта кетейік, қыздың анасы 2025 жылдың 5-нен 6-сәуірге қараған түні — оқиға болғаннан кейін бірден «Немолчи» қорына жүгінген. Сол уақытта анасы баланы сот-медициналық сараптамаға апара жатқан.

Қордың мәліметінше, ер адам жасаған қылмысының мәнін толық түсінген. Туыстары оны әрекет үстінде ұстағаннан кейін, ол қашуға тырысып, бір тәулікке жуық уақыт ізін жасыруға әрекет еткен. Кейін полиция қызметкерлері оны ұстады.

Сот процесінде оқиғаға куә болғандардың айғақтары тыңдалды, олар болған жайды растаған. Сондай-ақ айыпталушының кінәсі сараптамалар нәтижелерімен, оның ішінде генетикалық зерттеулермен дәлелденді.

Жәбірленуші тараптың адвокаты Азамат Сағал тағайындалған жазаның заңды және негізді екенін айтты.

«20 жылға бас бостандығынан айыру жазасы тағайындалды. Жәбірленуші тарап үкіммен толық келіседі және оны заңды әрі негізді деп санайды. Материалдық немесе моральдық шығын өндіру туралы талап қойылған жоқ», – деді адвокат.

Сот үкімі заңды күшіне енген жоқ.