Танымал әзілкеш Тұрсынбек Қабатов су тасқынынан зардап шеккен халыққа 1 млн теңге қаржылай көмек көрсетті. Бұл жайлы Айгүл Мұқанова есімді желі қолданушысы Instagram  парақшасында жазды.

Видеода  әлеуметтік желіде жолданған хатты көруге болады. Ол жерде «Су тасқынынан зардап шеккен Үрпек ауылының тұрғындарына Тұрсынбек Қабатов 1 млн теңге қаржылай көмек берді. Тұрсынбек пен Мөлдір қарындасымызға мың алғыс. Балаларыңның қызығын көріңдер», – деп жазған.

Ал бұл видеоны әлеуметтік желіге бөліскен Айгүл Мұқанова есімді желі қолданушысы  күйеу баласы Тұрсынбек пен сіңлісі Мөлдірге ризашылық сезімін білдіріп, пост жазады. 

«1996 жылы анамыздан айырылып, әкеміз қарт анасы мен алты баласын алып, басқа елдімекенге көштік. Әкем көреген кісі болған еді. Өзі оқыған кісі. «Облыс орталығынан жол алыстығы біздің де білім алуымызға кедергі болады» деген шығар, темір жол станциясы бар Державинск қаласына тәуекел деп көшіп барған едік. Сол көшіп кеткен 1997 жылдан бастап, ауылымыз, мектебіміз, анам жатқан қорым, балалық шақ өткен аулам, үйім бәрі сағыныш болып әлі тұр. Тұрсынбек пен Мөлдірдің ауылымызға деп жіберген көмегіне мен де қатты қуандым. Есепсіз таза ниеттері үшін де риза болдым. Әкем мен анам көзі тірі болғанда қара шаңырақта отырар ма еді? Өкінішке қарай, ол кісілер жоқ. Бірақ ауылымыз бар, көңілге медеу. Ауыл ақсақалдарынан келіп жаткан ақ бата, ризашылығын естіп, «аумин» деп отырған жайым бар. Жақсының жақсылығын айтып отырғанды жақсы көремін. Осындай жақсылықты туған бауырым мен күйеу балам істесе, оны тіпті айтқым келді. Тұрсынбек-Мөлдір бақтарың еселене берсін. Еліміз аман болсын! Елдің азаматтары мықты бола беріңіздер! Жасаған қаржылай көмектерің, халықтың пайдасына тие берсін, бата алып сендер де өсіп-өне беріңдер», – делінген.