Қазақ ұлттық қыздар педагогикалық университеті әлемдік беделге ие Times Higher Education Impact Rankings 2025 жаһандық рейтингіне үшінші жыл қатарынан енді. Бұл рейтинг – жоғары оқу орындарының Біріккен Ұлттар Ұйымының 17 Тұрақты даму мақсатына қосқан үлесін бағалайтын маңызды көрсеткіш.

Университеттің бұл тізімге енуі – білім беру, ғылыми-зерттеу және әлеуметтік жауапкершілік салаларындағы жетістіктерінің халықаралық деңгейде мойындалғанының  айғағы.

2025 жылғы рейтингке әлемнің 2526 жоғары оқу орны қатысып, университеттер арасындағы бәсекелестік айтарлықтай артты (салыстыру үшін: 2024 жылы – 1963 ЖОО). Университеттер арасындағы бәсекелестік күшейгеніне қарамастан, QyzPU 1501+ деңгейіндегі орнын сақтап қалды. Бұл — оқу орнының ұзақмерзімді стратегиялық даму жоспарының тиімділігін және тұрақтылыққа бағытталған қадамдарының нәтижелілігін айғақтайды.

Университет БҰҰ-ның барлық 17 Тұрақты даму мақсаты бойынша бағаланып, келесі нәтижелерге қол жеткізді: кедейлікті жою – 1001+ орын, аштықты жою – 801+ орын, жақсы денсаулық пен әл-ауқат – 1001–1500 орын, сапалы білім беру – 1001–1500 орын, гендерлік теңдік – 301–400 орын, таза су және санитария – 801–1000 орын, қымбат емес және таза энергия – 1001+ орын, лайықты жұмыс және экономикалық өсу – 1001+ орын, индустрияландыру, инновациялар және инфрақұрылым – 1001+ орын, теңсіздікті азайту – 801–1000 орын, тұрақты қалалар және елді мекендер – 801–1000 орын, жауапты тұтыну және өндіріс – 801+ орын, климаттың өзгеруімен күрес – 1001+ орын, теңіз экожүйелерін сақтау – 601+ орын, құрлықтағы тіршілік – 601–800 орын, бейбітшілік, әділдік және тиімді институттар – 1001+ орын, тұрақты даму үшін серіктестік – 1501+ орын.

QyzPU тұрақты даму саласындағы бастамаларды жүзеге асыруда және әлеуметтік әділеттілік пен экологиялық тұрақтылықты ілгерілетуде белсенді жұмыс жүргізіп келеді. Университеттің ғылыми-зерттеу қызметі мен білім беру бағдарламалары осы маңызды бағыттарды қамти отырып, қоғамның орнықты дамуына маңызды үлес қосуда.

Айта кетейік, Times Higher Education Impact Rankings – жоғары оқу орындарының жаһандық деңгейде ТДМ-ға қол жеткізуге қосқан үлесін кешенді түрде бағалайтын халықаралық рейтинг. Қазақ ұлттық қыздар педагогикалық университетінің аталмыш рейтингке енуі – университет ұжымының ерен еңбегінің жарқын көрінісі.