Қымбат ресторандар мен элиталы фитнес-клубтардың тапқан табысы мен төлеген салығының есебі енді мұқият қаралады. Мемлекеттік кірістер комитеті Қазақстан бойынша бұл саладағы кәсіпкердің бірін қалдырмай тексермек. Ал Алматыдағы бизнесмендер, соның ішінде фитнес-клубтардың иелері бұған қарсы.

“Мемлекет әдеттегідей халыққа қажет кәсіптерге қолдау көрсетудің орнына қыспаққа алып жатыр. Фитнес-клубтар адамдардың салауатты өмір салтын ұстануына көмектеседі. Бірақ бізді табысты шалқыған миллиардер көреді. Тексерісті негізсіз деп санаймын. Өйткені көбі ғимарат жалдап отыр, қызметкерлер саны да, табысы да әр кезде әртүрлі”, – деді фитнес-клубтың директоры Татьяна Салатина.

Мемлекеттік кірістер комитетінің хабарлауынша, тексеріс мейрамханалар мен жаттығу залдарының иелері декларацияда көрсеткен ақпаратты тексеру үшін жүргізіледі. Яғни кірісі мен шығысы туралы есебі сәйкес келмесе, шара қабылданбақ.

“Салық төлеуден жалтарған салық төлеушілерді тексеру жалғасып жатыр. Осы жұмыс аясында ірі премиум фитнес-клубтар мен мейрамханалар саласында декларацияда көрсетілген нақты шығындар мен кірістер, қызметкерлер санын салыстыру мақсатында хронометражды тексерулер тағайындалды”, – деп мәлімдеді мемлекеттік кірістер комитеті басқарма басшысының орынбасары Еламан Есенбетов.

Бірақ премиум санат ретінде қандай ресторандар мен фитнес-клубтар қаралатыны нақты айтылмады.

Айта кетсек, бүгінде қазынаға салықтан 27 миллиард теңгеден көп ақша түскен. Соның 3 миллиардқа жуығын сауда, 2 миллиард теңгені қызмет көрсету саласынан алынған екен.

Еске салайық, бұған дейін мемлекеттік кірістер комитеті қазақстандық блогерлерге салық бойынша хабарламалар жібергені туралы хабарлаған едік. Оларға жалпы құны 53 миллиард теңгені төлеуге бір ай уақыт берілгенін мәлімдеді. Осыдан соң желіде салықтан жалтарған блогерлердің тізімі пайда болды.