Импичментке елдің Ұлттық ассамблеясының 300 депутатының 204-і қолдау білдірді. Парламенттің 85 депутаты қарсы болды, тағы үшеуі қалыс қалды, сегіз дауыс жарамсыз деп танылды.  Импичмент жариялау үшін депутаттардың кемінде үштен екі бөлігінің қолдауы қажет болды. Импичмент туралы шешім оның кеңсесіне жеткізілгеннен кейін Юн Сок Ёль қызметінен босатылады, ал премьер-министр Хан Дак Су президенттің міндетін атқарушы болады. Бұған дейін Оңтүстік Кореяның Ұлттық ассамблеясы өткен аптада әскери жағдай енгізу әрекетіне қатысты Юн Сок Ёл мен жеті шенеунікті тез арада қамауға алуды талап ететін қарар қабылдады.  Сондай-ақ Оңтүстік Корея парламенті президент Юн Сок Ёльға қатысты айыптауларды тексеру үшін арнайы прокурор тағайындау туралы заң жобасын қабылдады.  Бұған дейін Оңтүстік Корея президентіне сапарға шығуға тыйым салынды. Елден шығуға тыйым салу Юн Сок Ёль жариялаған әскери жағдайға байланысты тергеу амалдары үшін қажет болды.  Еске сала кетсек, Оңтүстік Кореяның прокуратурасы президентке қарсы мемлекетке опасыздық жасады деген айып тағып отыр. Оңтүстік Кореяның бұрынғы қорғаныс министрі де мемлекетке опасыздық жасады деген айыппен қамауға алынды.