Сараптамаға сәйкес облыста болатын өрттердің 80%-ы жекеменшік тұрғын үй аумағында тіркеледі. Ал басым бөлігі жылыту маусымында болады.

Облыстық төтенше жағдайлар департаменті бастығының орынбасары Қайрат Шаймарденовтың айтуынша, өткен жылыту маусымында салыстырмалы кезеңге қарағанда оқыс оқиғалар 34%-ке азайған. Келтіріген шығын көлемі 14 млн теңгеге жуықтаған.

Облыста жылыту маумымы басталмай жатып, улы газдан уланудың бір оқиғасы тіркелді. Салдарынан екі бала зардап шегіп, ауруханаға жатқызылды. Бұған көмірмен жағылатын пешті пайдалану ережелерін бұзу себеп. Нақтырақ айтқанда, пештің мұржасы тазаланбаған. Жалпы, қайғылы оқиғалардың басым бөлігі ішімдікке мойынсұнған отбасыларда орын алады. Өрт қауіпсіздігін сақтамау мен электр құралдарын монтаждау ережелерін бұзу да негізгі себептердің қатарында, - дейді Қайрат Шаймарденов.

Жылыту маусымы кезеңінде профилактикалық шаралар күшейтіледі. Сонымен қатар, әлеуметтік әлжуаз топтарға жататын азаматтар арнайы есепке алынады. Бүгінгі күні салалық мекеменің есебінде 1200-ден астам жер үй тұр. Бұл баспаналарда үш мыңнан астам адам тұрады. Ал департамент мен демеушілердің көмегімен улы газды анықтайтын 300-ге жуық датчик зейнеткерлер мен жағдайы қиын жанұялардың үйлеріне орнатылды.

Мамандардың айтуынша, түтінді бірден анықтайтын құралдарды әр азамат жеке қауіпсіздігі үшін сатып алып, орната алады.