Ақтөбеде 5 қыркүйек – Қазақстан халқының тілдері күніне орай жас ақындардың республикалық «Жыр жауһары» поэзиялық сайысы өтті. Байқауды Ақтөбе қалалық Жастар ресурстық орталығы ұйымдастырды, деп хабарлайды Oimaqnews.kz Qaz365.kz. сайтына сілтеме жасап. 

Сайысқа 10 жас жазба ақын қатысып, тіл, Ақтөбе қаласы және еркін тақырыпта өлең оқыды. Жыр додасына Ақтөбеден бөлек Орал, Алматы және Қызылорда қалаларынан да жас ақындар келген.

Байқау екі кезеңнен тұрды. Алғашқы «Жыр жауһары» кезеңінде қатысушылар тіл немесе Ақтөбе қаласына арналған бір өлең және еркін тақырыптағы бір шығармасын ұсынды. Қазылар алқасының шешімімен алты ақын келесі кезеңге өтті.

«Көңіл дәптері» деп аталған екінші кезеңде ақындар жеребе арқылы жұптасып, еркін тақырыпта екі өлеңнен оқып, өзара бақ сынады.

Байқау қорытындысында алматылық Піржан Сандыбай бірінші орын алды. Екінші орын ақтөбелік Нұрсерік Тәуекелов пен қызылордалық Бексұлтан Санақұлға бұйырды. Үшінші орынды Орал қаласынан келген Дәурен Шамұратов иеленді.

Ақтөбелік Жанерке Жанкеева арнайы жүлдемен марапатталды. Барлық қатысушыға алғыс хат пен қаржылай сыйақы табысталды.