Мешіттен аяқ киім ұрлаған ер адам ұсталды
Аталған факті бойынша сотқа дейінгі тергеп-тексеру басталды.
Елорда аумағында мешіттердің бірінде тіркелген ұрлық фактісі бойынша 34 жастағы ер адам анықталып, ұсталды, деп хабарлайды Oimaqnews.kz turkystan.kz.сайтына сілтеме жасап.
Тергеу барысында белгілі болғандай, күдікті мешітке келіп, келушілерге арналған аяқ киім сөресінен құны 175 мың теңге тұратын кроссовканы жасырын түрде иемденген. Ол өзіне тиесілі ескі аяқ киімін сол жерде қалдырып, жаңа кроссовканы киіп, еш кедергісіз шығып кеткен.
Жедел-іздестіру іс-шаралары барысында полиция қызметкерлері бейнебақылау камераларының көмегімен күдіктінің жеке басын анықтап, оны қысқа мерзімде ұстады. Ұрланған аяқ киім тәркіленіп, иесіне қайтарылды.
Аталған факті бойынша сотқа дейінгі тергеп-тексеру басталды. Қазіргі уақытта күдіктінің осыған ұқсас басқа да құқық бұзушылықтарға қатысы бар-жоғы тексеріліп жатыр.