Жол апаты: заңды бұзған шенділердің балаларына шектеу бола ма?
Бұл туралы заңгер Arasha.kz сайтына берген пікірінде айтты.
Алматы көшелерінде болған қайғылы апат жай ғана жол ережесін бұзудың салдары емес, шенділердің заңды белшесінен басып, шектен шыққандығының айқын көрінісі. Заңгер Молдахан Әділетхан бұл оқиғаның астарында «ерке балалардың» (золотая молодежь) жазасыздығы мен құқық қорғау органдарының кейбір лауазымды тұлғаларының қатысы бар екенін ашық айтып, мәселенің мән-жайын егжей-тегжейлі баяндады.
Заңгердің айтуынша, бұл оқиға кездейсоқ емес. Бес бірдей қымбат көлік қала ішінде жарыс ұйымдастырып, «У Афанасьича» мейрамханасынан бастап Достық даңғылымен солтүстікке қарай жоғары жылдамдықпен жүйткіген. Олар қос жолақты қиып өтіп, Әл-Фараби даңғылында сағатына 250 шақырым жылдамдықпен қарсы бағытқа шығып қарсы келген «Мерседес» көлігіне соқтыққан. Соққының күші сондай, Фурманов көшесіндегі қалтарысқа (кармашка) ұшып кеткен.
Заңгер көтерген ең өзекті мәселе – жарысқан көліктердің ішінде Полиция департаменті бастығы орынбасарларының қызметтік көліктерінің жүруі. Оның дерегінше, бұл көліктер бір күннің ішінде 1 миллион теңгеге жуық айыппұл жинап үлгерген. Ең сорақысы, бұл көліктер жалған нөмірлермен немесе мүлдем нөмірсіз жүрген, ал терезелері заңсыз күңгірттелген.