Тергеуді агенттіктің Ақмола облысы бойынша департаменті жүргізді. Екі жыл бойы «МолПродЖаркаин» ауылшаруашылығы өндірістік кооперативінің директоры А.Ефимкина және «Рассвет» шаруа қожалығының басшысы А. Маслов сүт және оны терең өңдеу өнімдерінің өндірісін арзандатуға арналған субсидияларды заңсыз алған.

Шаруа қожалығы мәлімделген көлемде сүт өндіруге жеткілікті мал басы болмаған. Соған қарамастан ақпараттық жүйеде ауылшаруашылығы өндірістік кооперативіне 3 млн келіден астам сүт жеткізілгені туралы жалған құжат рәсімделген. Осы құжат негізінде сүтті сары май мен ірімшікке өңдеу туралы есептер жасалып, уәкілетті орган өтінімді мақұлдағаннан кейін қаражат кәсіпорынның есепшотына аударылған.

Мемлекетке 152 млн теңге залал келтірілген.

Тергеу барысында 6 жер учаскесіне, 4 пәтерге, 11 автокөлікке, мобильді ғимаратқа және өндірістік нысанға тыйым салынды. Бұдан бөлек, субсидиялардың бір бөлігі жасыру мақсатында А.Ефимкинаның туысының депозитіне аударылған. Кейін бұл қаражатқа мобильді ғимарат сатып алынып жалға берілген.

Сот үкімімен А.Маслов пен А.Ефимкина 6 жыл 4 ай мерзімге бас бостандығынан айырылды. Мобильді ғимарат мемлекет кірісіне тәркіленді.