Назарбаев Университетінің студенті Нұрсұлтан Табынбай Qaz365.kz тілшісіне жоғары оқу орнына түскендігі туралы құжатының бар екеніне қарамастан, 4 маусымда өзін көшеден ұстап, әскерге алып кеткені, отбасылық жағдайы, оқуын жалғастыру мүмкіндігі және әділдіктен үміт үзбейтіні туралы айтты.

«Әскерден қашқан емеспін. Тек әділдік іздеймін"

«Мен қазір Қарағандыдағы №6505 әскери бөлімінің қатардағы жауынгерімін. Бүгін ант қабылдадық. Бірақ мен болашағыма қатты алаңдаймын. Әскерде бәрі жақсы. Жақсы тамақтандырады, бұл жағынан ешқандай мәселе жоқ. Мен ешқашан әскерден қашқан емеспін. Бірақ қазір әділдік іздеудемін. Білімнің биік шыңына ұмтылған жылдарымды бір-ақ сәтте жойып жібергендей сезімдемін. Бұл әділетсіз. Қазіргі таңдағы басты арманым – оқуымды жалғастыру. Әскерге шақыру қағазын да ешкім берген емес», - дейді ол.

Көшеден ұстап әкетті

Нұрсұлтанның айтуынша, ол кеште жұмыстан қайтып келе жатқанда ойламаған жерден ұсталған.

«Түнгі сағат 11-дің шамасы болатын. Мен дүкеннен шыққанда, алдымнан бейтаныс адамдар кездесіп, амандасты. Мен де амандастым. Олардың бірі өзін әскери комиссариаттанмын деп таныстырды. Мен оларға студенттік билетімнің бар екенін айттым. Бірақ олар «Біздің базада жоқсыз, сондықтан оның еш мәні жоқ» деді. Мәселе университет тарапынан болуы мүмкін, бірақ мені бәрібір алып кетті. Әуелі Қарасай ауданына апарды. Ол жерде мен өзімнің студент екенімді, оқу тамыз айында басталатынын ресми түрде мәлімдедім. Оқуға өз еңбегімен, ешкімнің көмегінсіз түскенімді айттым. Мен толық емес отбасынан шыққанмын. Енді ғана еңсемді көтере бастағанда, болашағыма балта шапты».

Болашағына кері әсер етуі мүмкін

Егер әскерден шығуға мүмкіндік болмаса, бұл үлкен қаржылық және уақытша шығындарға әкелетінін атап өтті:

«Біріншіден, бұл қаржы мәселесі. Қайтадан дайындыққа қыруар ақша төлеп, SAT, IELTS-ті тапсыруым керек. Бұл кем дегенде миллион теңгеге шығады. Қазір жұмыссыз болғандықтан, бұл өте қиынға соғады. Өз еңбегіммен, маңдай теріммен түскен оқуымды жалғастырғым келеді. Егер сот әділ болып, университетке оралуға рұқсат берсе, бақытты болар едім. Мен шын көңіліммен туған жеріме, еліме қолымнан келетін салада еңбек еткім келеді».

Отбасы, құжаттар және әскери комиссариаттың әрекеті

«Менің ата-анам 2019 жылы ажырасқан. Содан бері жалғыз өзім тұрамын. Отбасымызбен ауылда пәтер жалдап тұрамыз. Мені алып кеткеннен кейін олар үйге келді, оқуға түскенімді, ресми шақыруымның бар екенін дәлелдейтін қолымыздағы барлық құжаттарды көрсеттік. Бірақ оны ешкім құлағына да ілген жоқ. Менің ойымша, оларға тек әскерге шақыру жоспарын артығымен орындаса болғаны».

Нұрсұлтанның айтуынша, әскери бөлімде оған жақсы қарайды екен.

«Әскерде маған жақсы қарайды. Мен сотта мұның бәрін айта аламын деп үміттенемін», – дейді бозбала.

«Мен байдың баласы емеспін. Тек оқуымды уайымдаймын»

«Адамдардың мен туралы «байдың баласы екен, Назарбаев мектебінде оқыған, әскерге барғысы келмейді» деген сияқты жаман пікірде болғанын қаламаймын. Мүлде олай емес. Мен байдың ұлы емеспін, қарапайым ғана отбасында туып-өстім. Ешқашан әскерге барудан жалтарған емеспін. Тек қана әділдік салтанат құрса екен деймін. Аңсаған арманыма жету үшін көп еңбек сіңірдім, университетке оқуға түсу де оңай болған жоқ. Сондықтан азар қол жеткізген оқуымды әрі қарай жалғастыруға мүмкіндік беруді сұраймын», – деді ол әңгімесін аяқтай келе.

Адвокат Жандос Ниязалиев сондай-ақ әскери бөлімде өткен ант қабылдау рәсіміне Нұрсұлтан Табынбайдың қатысуы туралы түсініктеме берді. Заңгердің айтуынша, оның қарсылығына қарамастан, әскерилер бұл рәсімді талап еткен және туыстарына мұның қарапайым ғана рәсім екенін алдын ала хабарлаған. Шындығында, оқиға басқаша өрбіген – ант беруді теледидардан көрсетіп, Нұрсұлтаннан болып жатқан оқиғаға қатысты қамера алдында пікірін сұраған. Сөйтіп, оны ешқандай қарсылығы жоқ сарбаз ретінде көрсетпек болған.

«Мен бұған бірден қарсы болдым, өйткені біздің қолымызда оның студенттік мәртебесі туралы растайтын құжаттар бар. Заң бойынша университетке түскендерді шақыруға болмайды. Қазір болып жатқанның бәрі құқықтық тұрғыдан алғанда дұрыс емес. Ол әу бастапқыда ол жерде болмауы керек еді», – дейді адвокат.

Естеріңізге сала кетейік, бұған дейін заңгер Жандос Ниязалиев қорғаныс істері жөніндегі бөлімнің Нұрсұлтан Табынбайды әскерге шақыру бойынша заңсыз әрекет еткенін айтқан болатын. Қазір қызметкерлерге қатысты қызметтік тергеу жүргізілуде, ал іс материалдары аяқталғаннан кейін әкімшілік сотқа берілетін болады. Заңгер әскерге шақырудың алдында ғана Нұрсұлтанның қабылдау емтихандарынан өтіп, университетке оқуға шақыру алғанын, яғни кейінге қалдыруға заңды құқығы бар екенін атап өтті.