Зал лық толы. Шынайы оқиға желісімен сахна­лан­ған қойылымнан ерекше әсер алған көрермен кө­зіне еріксіз жас алды. Театрсүйер қауымның кө­беюі, онлайн билет кассасындағы аншлагтың болуы – театр үшін жетістік. Сәтті шыққан спектакль­дің режиссері – Әли Бидахмет.

«Залымызды сіздердей көрермен толтырмаса, бұл спектакль дәл қазіргідей деңгейге жетпейтін еді. 2024 жылдың 24-25 қазанында көрерменге ұсынылған премьера осы уақытқа дейін 10 мыңнан артық көрерменді қабылдаған екен. Және биыл Тикетон премиясын ұйымдастырған театр бөлімі бойынша біздің қойылым жылдың үздік спектаклі деп танылды» – деді режиссер Әли Бидахмет.

«Танакөз» поэмасы – ғажайып лирикалық дүние. Оның қағаз бетіне түскеніне 30 жылға таяды. Бұл уақыт арасында аталмыш шығарма көптің есінде қалып, бірқатар театрдың сахнасында әртүрлі үлгіде көрерменімен қауышып отырды. Дос­тық пен махаббат деген ғаламат сезімді ерекше эмоция, әуезді әнмен жеткізген қойылымда әдемі мақпал сезімге бөлендік. Спектакльге «Танакөз» поэмасының авторы Мұхтар Шаханов та  қатысты. 

«Үшеу едік. Қайда барсақ – қасымызда Танакөз, Танакөзбен көңілді еді біздің ерке бала кез». Мело­дра­м­а жанрындағы спектакль қазіргі қоғам шөлір­ке­ген рухани қажеттілікті осы үшеудің арасындағы «Дос» ұғымы арқылы шегелеп ұғындырып берді. Поэмамен таныс көрермен қойылымның сценарий­ден ауытқымай, еш бояусыз көрсетілгенін бірден ұқты. Қойылым мазмұны бойынша әкеден ұласқан дос­тық Мұхтар мен Мұраттың арасында өрбиді. Екеуі жастайынан егіз қозыдай қатар өседі. Екеуінің ортасында көзі танадай Танакөз де бірге бойжетеді. Мектеп бітіріп, ересек өмірге аяқ басқан екі достың көңі­лі Танакөзге түсіп, бір-бірінен жасырады. Екі жү­рек – Танакөзге ғашық. Әркімнің қолы жетпейтін шы­найы махаббат үшін ұзақ жылғы достықтан баз ке­шу мүмкін бе? Бірақ Мұрат тел өскен досының Та­накөзге ғашық екенін біліп, қаладан енді келген Зеркүлге үйленіп, отау құрады. Сезімін іште тұн­шық­­тырып, достықты биік қойған Мұраттың бұл ше­шімі Мұхтар мен Танакөз тағдырының қосылуына ық­пал ете алмады. Ал арада сезім болмаған Мұрат пен Зергүлдің өмірі бір арнада тоғыспады. Трак­тор­дың астында қалып, екі аяғынан бірдей айырылған Мұрат­тың қайғысына шыдамай, анасы қайтыс бо­лады. Сонша қиындықтан кейін Зергүлге деген көңі­­­­лінің болмағанын айтып, кетуін өтінеді. Ал Мұхтар жан досының мұндай трагедияға ұшыра­ға­нына бейжай қарамай үйіне келсе, Мұраттың қа­сы­нан Танакөзді көреді. Ақырында екі ғашықтың бір-біріне деген сезімі барын түсінеді. Осылайша, үшеуі тағы да ақ көбігін шашып тұрып ағатын Ақсу суын­да балаша ойнайды. Спектакль осылай тәмам­далды. 

Бүгінгі қоғамда жібі сетінеп бара жатқан нағыз дос­тық пен пәк махаббат тақырыбын арқау еткен қойы­лымның жүгі ауыр. Бұлай деуіміздің себебі –спек­такльдің драматургиялық құрылымы кейіп­керлердің эмоционалдық жағдайымен көрінеді. Оның көрерменге жетуі үшін актерлерге артылған талап та жоғары. Түрлі жанрда сахнаға ұсынылатын «Танакөздің» мәні қай кезде де айрықша екені белгілі. Көрерменнің сарғая күтетіні де сондықтан. Ә.Мәмбетов атындағы драма  және комедия театрын­да қойылған «Танакөз» премьерасы театр қоржынындағы алғашқы мелодрама емес. Айта кетейік, премьерадан кейін М. Шахановтың қол­таңбасы қойылған сатылымдағы кітаптар келген қонақтардың қолына тиді.