Мәжіліс депутаты "AMANAT" партиясы фракциясының мүшесі Еділ Жаңбыршин елдің ішкі саясатына сыртқы күштердің ықпал етуіне байланысты мәселелерді көтеріп, Үкімет басшысы Олжас Бектеновке депутаттық сауал жолдады.

Депутаттың айтуынша, геосаяси доминант мемлекеттер өзінің жеке мүддесі мен саяси ықпалын жүргізіп қана қоймай, оны іске асыру үшін әртүрлі әдіс-тәсілдерді пайдаланып келді. Мысалы, мемлекеттердің ұлттық құндылықтарын жоюға бағытталған әсірефеминистік, ЛГБТ, эмо және басқа да субъмәдениеттік қозғалыстар арнайы, жоспарлы түрде миллиондаған АҚШ долларымен қаржыландырылып отыр. 

Жаңбыршин қазір АҚШ Конгресінде Халықаралық даму агенттігінің, яғни USAID-тің жұмысы тоқтатылатыны туралы мәселе қаралып жатқанын атап өтті. Соңғы он жылдықта Қазақстанның ішкі саясатына ықпал ету үшін USAID-тен 150 млн доллардан астам қаражат бөлініпті. Осындай ұйымдар демократиялық қағидаттарды желеу етіп, жалаң ұранмен «жұмсақ күш» арқылы өзінің жымысқы саясатын іске асыру үшін өзге мемлекеттерге қаншама қаражат бөлген. 

- Бізде шетелдік гранттар арқылы қаржыландырылатын кейбір үкіметтік емес ұйымдар елдегі жағдайды тұрақсыз деп көрсетіп, шындыққа жанаспайтын ақпарат таратады. Оларға Қазақстанның жақсарғаны емес, шайқалғаны пайдалы. Себебі өздерінің жеке басының пайдасына, яғни "гуманитарлық бизнесіне" қаржы керек, – деп нақтылады депутат.

Осы ретте Еділ Жаңбыршин еліміздің ішкі саясатына сыртқы күштердің араласуын шектеу үшін Үкіметке нақты шаралар қабылдауды ұсынды.

- Ең алдымен, Қаржы министрлігі мен тиісті мемлекеттік органдарды іске қосып, еліміздің ішкі саясатына араласуға бағытталған сырттан құйылған қаржыны анықтап, тиісті шара қабылдасын. 

Келесі, шетелден қаржыландырылатын ұйымдардың қызметін реттейтін қолданыстағы заңнаманың тиімділігіне талдау жүргізсін.

Сондай-ақ, шетелдік гранттар арқылы қаржыландырылатын жобалар мен ұйымдардың қызметін бақылау және реттеу механизмдерін жетілдіру қажет, - деді депутат.

Депутаттың айтуынша, шетелдік қаржы инвестиция ретінде экономиканы дамытуға құйылатын болса, экология мен денсаулық сақтау саласын жақсартатын болса, онда оған ешқандай кедергі болмауы тиіс. Ал ішкі саясатымызға қарсы, ұлттық дүниетанымымызға жат, тұрақтылығымызды шайқайтын жобаларды қаржыландырса қатаң түрде тосқауыл қою қажет екенін де атап өтті.