Еркін күрестен 57 келіге дейінгі салмақта өнер көрсеткен Мерей финалда түркиялық Бекир Кесерді 8:0 есебімен жеңді. Бұл Қазақстан құрамасының осы чемпионаттағы еркін күрестен жалғыз медалі болды.

Базарбаев жарысты АҚШ өкілі Люк Лилледальді 3:1 есебімен жеңуден бастады. Ширек финалда франциялық Расул Галбораевтан 13:2 есебімен басым түссе, жартылай финалда жапониялық Даито Катсумені 7:0 есебімен ұтты.

Мерей Базарбаев 23 жасқа дейінгі балуандар арасында еркін күрестен әлем чемпионы атанған екінші қазақстандық болды. Бұған дейін, 2024 жылы Албания астанасы Тиранада Ризабек Айтмұхан 97 келіге дейінгі салмақта алтын медаль жеңіп алған еді.

Лас-Вегастағы әлем чемпионатын Қазақстан құрамасы жеті жүлдемен аяқтады. Грек-рим күресінің шеберлері екі алтын, бір күміс және екі қола медаль иеленді. Еркін күрестен бір алтын, әйелдер күресінен бір қола жүлде қоржынға түсті.