Қазақстан Өзбекстан тарапының Астанада ұсталған профессор Икболжон Қарабоевқа қатысты іс туралы ресми түрде хабардар етілгенін мәлімдеді. Бұл туралы Ұлттық қауіпсіздік комитеті ҚазТАГ сауалына берген жауабында мәлім етті, деп хабарлайды Oimaqnews.kz Qaz365.kz. сайтына сілтеме жасап. 

«Қазақстан Республикасы Қылмыстық-процестік кодексінің 201-бабына сәйкес, сотқа дейінгі тергеу материалдары жария етуге жатпайды. Қазақстан Республикасының заңнамасына сәйкес, өзбек тарапы дипломатиялық арналар арқылы ресми түрде хабардар етілді», – деп жауап берген ҰҚК өкілдері.

Ведомство тергеудің мән-жайына қатысты өзге де егжей-тегжейлі деректерді жариялаудан бас тартты.

Бұған дейін BBC Астанадағы Мақсұт Нәрікбаев атындағы университетте халықаралық қатынастар пәнінен сабақ берген өзбек профессоры Икболжон Қарабоевтың Қазақстанда тыңшылық ісі бойынша ұсталғанын хабарлаған болатын.