Отбасы банктегі мемлекеттік сыйақы кімдерге беріледі
Бұл туралы Отбасы банк төрағасы Ләззат Ибрагимова мәлімдеді.
Отбасы банктегі тұрғын үй жинақтарына берілетін мемлекеттік сыйлықақыны сақтау жоспарланып отыр. Алайда алдағы уақытта оны есептеу тәртібі өзгеруі мүмкін. Жаңа талаптар қабылданған жағдайда олар тек жаңадан жасалған шарттарға қолданылады. Бұл туралы Отбасы банк төрағасы Ләззат Ибрагимова мәлімдеді, деп хабарлайды Oimaqnews.kz Qaz365.kz. сайтына сілтеме жасап.
Кездесу барысында Ибрагимовадан бұған дейін талқыланған тұрғын үй жинақтарына мемлекеттік сыйлықақы төлеуден бас тарту мүмкіндігі және бұл мәселе бойынша қандай шешім қабылданғаны сұралды.
Банк төрағасы Қазақстандағы тұрғын үй құрылыс жинақ жүйесі Германия үлгісімен құрылғанын, онда да мемлекет салымшыларды қаржылай ынталандыратынын айтты.
Оның айтуынша, банк қолданыстағы жүйені өзгертудің бірнеше жолын, соның ішінде салымшылар отбасының табысын ескеретін тәсілдерді қарастырып жатыр. Қазір ұсыныстардың бірі алдын ала мақұлданған.
Алғашқы ықтимал өзгеріс баспанаға ақша жинауды тоқтатып, жүйеден шығатын салымшыларға қатысты.
Ибрагимованың айтуынша, Отбасы банк салымшылары нарықта табыстылығы жоғары банк салымдары болғанына қарамастан, қаражатын тұрғын үй депозитінде төмен мөлшерлемемен саналы түрде жинайды. Оның орнына олар тұрғын үй жинақ жүйесінің мүмкіндіктерін пайдалана алады.
Оның сөзінше, мұндай тетік мемлекеттік сыйлықақы төлеуге жұмсалатын шығынды азайтудың бір жолы болуы мүмкін.
Тағы бір өзгеріс Отбасы банктің жеңілдетілген қарызы арқылы баспана сатып алған азаматтарға қатысты ұсынылып отыр.
Егер салымшы, мысалы, «Ұмай», «Жасыл ипотека» бағдарламалары арқылы несие алса немесе 2 не 5 пайыздық мөлшерлемемен несиелік тұрғын үй сатып алса, осы қарыздың кепіліндегі депозитке бұдан былай мемлекеттік сыйлықақы есептемеу ұсынылады.
Сонымен бірге мемлекеттік сыйлықақыдан толық бас тарту жоспарланып отырған жоқ.
Осыдан кейін журналист ұсынылып отырған өзгеріс болашақта мемлекеттік сыйлықақыны барлық салымшы ала алмайды дегенді білдіре ме деп нақтылады.
Ибрагимова өзгерістердің қолданыстағы шарттарға әсер етпеуге тиіс екенін атап өтті.
Осылайша, қазіргі салымшылар үшін мемлекеттік сыйлықақы есептеу талаптары өзгермейді. Ықтимал шектеулер тиісті өзгерістер күшіне енгеннен кейін жаңа тұрғын үй депозитін ашатын салымшыларға қатысты болуы мүмкін.