Мәжіліс депутаты Бақытжан Базарбек 900 мың теңгеден асатын айлық табысының отбасылық шығындарды толық өтеуге жетпейтінін мойындады, деп хабарлайды Oimaqnews.kz 

Халық қалаулысының айтуынша, азық-түлік бағасының қымбаттауы мен балалардың үйірмелері мен киім-кешегіне кететін шығындар бір миллион теңгеге жуық жалақыны жеткізуге мүмкіндік бермейді. Осыған байланысты ол қаржылық тапшылықты реттеу үшін жұбайының да жұмыс істеуіне тура келгенін атап өтті.

Депутат өз әріптестерінің арасында бес-алты баласы бар көпбалалы отбасылардың бар екенін және қазіргі таңда бір баланы балабақша мен секцияларға апарып, киіндірудің өзіне шамамен 300 мың теңге жұмсалатынын алға тартты. Ол мұндай қымбатшылық жағдайында аталған айлық көлемі жеке өзінің де қажеттіліктерін толық өтей алмайтынын жеткізді.

Жалақыны қайта қарау және оның өсуіне қойылған мораторийді алып тастау мүмкіндігі туралы сұраққа жауап берген мәжілісмен мұндай шешімдерді өзі қабылдамайтынын түсіндірді. Ол елдегі қазіргі экономикалық жағдайда депутаттардың еңбекақысын өсіруді құп көрмейтінін және бұл мәселе алдағы бес жылда көтерілмейді деген пікірде екенін білдірді.

Қазақстанда 2022 жылдың қаңтарында Мемлекет басшысының тапсырмасымен Парламент депутаттары мен Үкімет мүшелерінің жалақысын өсіруге бес жылдық мораторий енгізілген болатын. Қазіргі уақытта мәжіліс депутаттарының орташа жалақысы еңбек өтіліне байланысты 500 мыңнан 1 миллион теңгеге дейінгі аралықты құрайды.