TikTok-та жарияланған Наурыз туралы бейнероликтен кейін діни алауыздықты қоздыру дерегі бойынша қылмыстық іс қозғалды, деп хабарлайды Oimaqnews.kz  

Полиция қызметкерлері діни алауыздықты қоздыру фактісі бойынша қылмыстық іс қозғады. Биыл 23 наурыз күні әлеуметтік желілерге мониторинг жүргізу барысында TikTok-та жарияланған, Наурыз мерекесіне қатысты діни және этномәдени сипаттағы жария мәлімдемелер бар бейнематериал анықталды.

Жедел іс-шаралар барысында 1991 жылы туған күдікті анықталып, ұсталды. Кейін ол уақытша ұстау изоляторына қамалды. Қазіргі уақытта қажетті тергеу әрекеттері жүргізіліп жатыр. Тергеу мүддесіне байланысты қосымша ақпарат жарияланбайды.

Бұған дейін интернетте ер адамның Қазақстан үшін Наурыз жат мереке екенін айтып, оны Ғашықтар күнімен салыстырғаны және «Персиядан келген пұтқа табынушылық рәсімі» деп атағаны көрсетілген бейне тараған болатын.