Қазақстан Ұлттық банкі базалық мөлшерлемеге қатысты кезекті шешімін жариялады, деп хабарлайды Oimaqnews.kz.

Ақша-кредит саясаты комитеті көрсеткішті жылдық 18 пайыз деңгейінде өзгеріссіз қалдыруды жөн көрген. Сарапшылардың айтуынша, бұл қадам инфляцияны бақылауда ұстау және экономикалық тұрақтылықты сақтау мақсатында қабылданған.

Мөлшерлеме неге өзгермеді?

Қазақстан Республикасы Ұлттық банкінің Ақша-кредит саясаты комитеті базалық мөлшерлемені ±1 пайыздық тармақ дәлізімен жылдық 18 пайыз деңгейінде сақтау туралы шешім қабылдады. Бұл туралы Ұлттық банктің баспасөз қызметі хабарлады.

«Қазақстан Ұлттық банкінің Ақша-кредит саясаты комитеті базалық мөлшерлемені +/- 1 пайыздық тармақ дәлізімен жылдық 18 пайыз деңгейінде белгілеу туралы шешім қабылдады. Бұл шешім негізгі макроэкономикалық көрсеткіштердің жаңартылған бағасы мен инфляция тәуекелдерінің теңгеріміне сүйене отырып қабылданды», – делінген хабарламада.

Инфляциямен күрестің төте жолы

Ұлттық банктің мәліметінше, елдегі инфляция біртіндеп баяулап келеді. Мысалы, 2026 жылғы ақпанда жылдық инфляция 11,7 пайызға дейін төмендеген. Қаңтар айында бұл көрсеткіш 12,2 пайыз болған. Азық-түлік бағасы 12,7 пайызға, азық-түлікке жатпайтын тауарлар 11,6 пайызға, ал қызметтер 10,8 пайызға қымбаттаған. Мамандардың айтуынша, инфляцияның баяулауына қатаң ақша-кредит саясаты, теңгенің нығаюы және тұтынушылық несиенің бәсеңдеуі әсер етіп отыр. Сонымен қатар Үкімет пен Ұлттық банктің бағаны тұрақтандыруға бағытталған бірлескен шаралары да ықпал еткен.

Айта кетейік, базалық мөлшерлеме – елдегі негізгі қаржылық индикаторлардың бірі. Ол банктердің несие мен депозит бойынша пайыздық ставкаларына тікелей әсер етеді. Яғни мөлшерлеме көтерілсе, несие қымбаттайды, ал депозит бойынша табыс жоғары болуы мүмкін. Бұл шаралар инфляцияны тежеу үшін қолданылады.

Келесі жоспарлы шешім 2026 жылғы 24 сәуірде жариялануы тиіс.