Алматыда оппозициялық саясаткер Алтынбек Сәрсенбайұлын еске алу рәсімі өтті. Іс-шараны марқұмның отбасы ұйымдастырып, оған әріптестері, достары және қоғам белсенділері қатысты, деп хабарлайды Oimaqnews.kz  Arasha.kz.сайтына сілтеме жасап. 

Бүгін саясаткердің өлтірілгеніне 20 жыл толды. 2006 жылдың ақпанында Алтынбек Сәрсенбайұлы іс-түзсіз жоғалып кеткен еді. Екі күннен кейін Алматы іргесіндегі тау етегінен Алтынбектің және көмекшісі Бауыржан Байбосын мен жүргізушісі Василий Журавлевтің мәйіттері табылды. Үшеуін де атып кеткен.

«Өкінішке қарай, саяси кісі өлімдерін тергеу көбіне объективті емес, саяси қысыммен жүреді. Бұл істің ақыры мұқият тергеліп, барлық тапсырыс берушілер анықталғанын қалаймыз», — деп атап өтті құқық қорғаушы Евгений Жовтис.

Саясаткердің туыстары мен әріптестері оның өліміне сол кездегі президент Нұрсұлтан Назарбаевты тағы да айыптады. Алтынбектің ағасы Рысбек Сәрсенбайұлы Президентке, Бас прокурорға және Жоғарғы сотқа істі қайта қарауды талап етіп арыз бергенін хабарлады.

«Бұл іс қайта жандануы тиіс. Біз бұл қылмыстың — негізгі тапсырыс берушілерден бастап, шүріппені басқандарға дейін — ашылуын талап етеміз. Біздің мақсатымыз — кек алу емес. Біз кекшіл емеспіз. Біздің қанымызда да, тегімізде де кек алуға деген құштарлық жоқ», — деді ол.

Бастапқыда кісі өліміне Сенат аппаратының бұрынғы жетекшісі Ержан Өтембаев айыпталған болатын. Кейінірек Назарбаевтың бұрынғы күйеу баласы Рахат Әлиев пен Ұлттық қауіпсіздік комитетінің бұрынғы төрағасы Әлнұр Мұсаев кінәлі деп танылды.