Бұл туралы Қазақстан Республикасының Ішкі істер министрлігі еске салды, деп хабарлайды Oimaqnews.kz.

Ведомствоның мәліметінше, сталкинг — бұл адамды оның келісімінсіз қайта-қайта мазалау, аңду, бақылау, қоңырау шалу, хабарлама жіберу, әлеуметтік желі арқылы тыныштық бермеу сияқты әрекеттер. Мұндай іс-қимылдар адамның психологиялық қауіпсіздігіне зиян келтіреді және заң бойынша қылмыс болып саналады.

Ішкі істер министрлігі сталкинг тек тұрмыстық жағдайда емес, онлайн кеңістікте де жиі кездесетінін атап өтті. Яғни, әлеуметтік желілер мен мессенджерлер арқылы қудалау да жауапкершілікке әкелуі мүмкін.

Заңға сәйкес, сталкинг жасаған адамға айыппұл салу, қоғамдық жұмыстарға тарту немесе әкімшілік қамау сияқты жаза қолданылуы ықтимал. Егер қудалау қорқыту, қысым көрсету немесе басқа да ауыр салдарға ұласса, жаза да күшейтіледі.

Министрлік азаматтарды мұндай жағдайға тап болған кезде үндемей жүре бермей, дереу полицияға жүгінуге шақырады. Уақытында арыздану арқылы құқық бұзушылықтың алдын алып, өз қауіпсіздігін қорғауға болады.