Әзірге сырттан гуманитарлық көмек керек емес – Смадияров

Елдегі су тасқынына байланысты әзірге сырттан гуманитарлық көмек керек емес. Бұл туралы Сыртқы істер министрлігінің ресми өкілі Айбек Смадияров мәлімдеді.

Ведомство өкілінің айтуынша, бүгінде Қазақстанның бірқатар өңірінде болған су тасқынына байланысты бауырлас Қырғыз мемлекеті өз бастамасымен көмек көрсеткен.

«Осыдан 2 күн бұрын Қырғыз Республикасы төтенше жағдай министрлігінің 15 жүк көлігі мен 1 жол талғамайтын көлігі Қазақстан шекарасын кесіп өтті. Онда 300 тонна жүк бар. Мысалы, су, күріш, қарақұмық жармасы, кәмпит, шай, қант және матрас, жылытқыш, кереует, шатыр болды.

Көптеген бауырлас елден телеграмма келіп жатыр. Олар қолдайтынын айтып, ниет білдіруде», - деді Айбек Смадияров СІМ-де өткен баспасөз мәслихатында.

СІМ өкілі Үкімет су тасқынына қарсы бар күшін салып, күресіп жатқанын жеткізді.

Журналистердің бірі «Демек, әзірге Қазақстанға сырттан көмек керек емес қой?» деп сұрағын тағы нақтылады.