Абай облысы Елдос Сметовке 10 миллион теңгенің сертификатын берді
Облыс басшылығының арнайы шақыруымен Олимпиада чемпионы Абай өңіріне барды.
Абай облысында алғаш рет ұйымдастырылған дзюдодан Қазақстан чемпионатына облыс басшылығының арнайы шақыруымен 2024 жылғы Олимпиада ойындарының чемпионы Елдос Сметов келді, деп хабарлайды turkystan.kz Abaiaqparatkz-ке сілтеме жасап.
Аймаққа келген спортшыны облыс әкімі Берік Уәли қабылдап, оның жастарға үлгі боларлық еңбегін ерекше атап өтті.
«Қазақстан дзюдосының символына айналған азаматтың Абай еліне келуі – жас спортшылар үшін зор мотивация. Оның қатысуы жарыстың деңгейін көтеріп қана қоймай, әрбір спортшыға үлкен мақсаттарға ұмтылудың маңызын көрсетеді», – деді өңір басшысы.
Берік Уәли даңқты спортшыға өңір жұртшылығы атынан құрмет көрсетіп, 10 миллион теңгенің сертификатын табыс етті.