Трамп әкімшілігі жүктілік кезінде Tylenol препаратының (парацетамолдың) қолданылуын аутизммен байланыстыруды көздеп отыр, ал денсаулық сақтау саласының шенеуніктері бұл ауруды емдеудің ықтимал әдісі туралы хабарлайды, деп жазады The Washington Post.

Бұл туралы ресми мәлімдемені Трамп әкімшілігі дүйсенбі күні жасайды деп күтілуде.

"Менің ойымша, біз аутизм проблемасына жауап таптық. Қалай ойлайсыздар?" – деді Трамп Аризонада Чарли Кирктің өліміне байланысты өткен аза тұту шарасында.

Басылымның хабарлауынша, федералды денсаулық сақтау шенеуніктері аутизмнің алдын алу және емдеу құралы ретінде Leikovorin-ді – фолий қышқылының қалпына келтірілген түрін (фолини қышқылы) ұсынбақ.

Газеттің төрт дереккөзге сүйенген ақпаратына сәйкес, федералды денсаулық сақтау органдары әйелдерге жүктіліктің ерте кезеңінде дене қызуы көтерілмеген жағдайда Tylenol қабылдамауға кеңес береді деп күтілуде.

Осы айдың басында The Wall Street Journal газеті АҚШ-тың денсаулық сақтау және әлеуметтік қызметтер министрі Роберт Ф. Кеннеди – кіші жақын арада кеңінен қолданылатын ауырсынуды басатын ацетаминофенді (Tylenol препаратының халықаралық атауы) жүкті кезінде пайдалануды аутизммен байланыстыратын есеп жариялайтынын жазды.

Осы хабарламадан кейін Tylenol өндірушісі Kenvue компаниясының акциялары күрт төмендеді.

Kenvue өкілі CNBC-ге берген мәлімдемесінде: "Жетекші медициналық сарапшылар мен әлемдік денсаулық сақтау реттеушілері мақұлдаған он жылдан астам мұқият зерттеулер ацетаминофен мен аутизмнің арасында ешқандай сенімді дәлел жоқ екенін көрсетті", – деді.

Компания басшылығы да жүкті әйелдердің дене қызуын түсіру үшін ацетаминофенге қауіпсіз балама өте аз екенін атап өтті.

Кеннеди аутизмді АҚШ Денсаулық сақтау және әлеуметтік қызметтер министрлігінің негізгі бағыттарының біріне айналдырып, бұл дерттің себептерін "түбіне дейін зерттеуге" уәде берді. Ол аутизмнің таралуы мен себептеріне қатысты расталмаған мәлімдемелер де жасаған.

Бұған дейін Трамп 20 жыл бұрын аутизм 10 мың баланың тек бірінде ғана кездессе, қазір әрбір 12-баладан анықталып отырғанын айтқан еді.

Қазақстандық мамандар да елімізде аутизм белгілері бар балалардың саны көбейіп келе жатқанын айтады. Қазір Қазақстанда 12 мыңнан астам балада аутизм белгілері тіркелген, ал әр екінші отбасында сөйлеу қабілеті бұзылған бала бар.