Шымкентте 11 жасар жасөспірім теміржол вокзалындағы жүк вагонының үстіне шығып, 27 мың вольттық токқа түсті. Ауыр жарақат алған бала қазір хәл үстінде, деп хабарлайды Oimaqnews.kz  Qaz365.kz.сайтына сілтеме жасап.

Дәрігерлердің айтуынша, оның денесінің 80 пайызын күйік шалған.

Оқиға 27 тамыз күні болған. Жасөспірім жүк вагонына арнайы баспалдақпен шығып, суретке түспек болған. Алайда жоғары кернеулі ток соғып, бала ауыр жарақат алды.

Желілік полиция бөлімінің мәліметінше, бала вокзалдың негізгі кіреберісінен өтпеген, сол себепті бақылау камераларына да түспеген. Қазіргі уақытта бұл факті бойынша қылмыстық іс қозғалып, тергеу жүргізілуде.

Нұрлан Қошқарбеков, Шымкент станциясы желілік полиция бөлімінің басшысы:

– ҚР Қылмыстық кодексінің “Темір жол көлігін пайдалану және қозғалыс қауіпсіздігі талаптарын бұзу” бабымен сотқа дейінгі тергеу амалдары басталды. Қосымша ақпарат ҚПК талаптарына сәйкес жарияланбайды. Осы орайда қала тұрғындарын теміржол аймағының аса қауіпті екенін ескертеміз.