ҚМДБ-ның мәліметінше, тату дәрет пен намазға кедергі емес, алайда ислам дінінде оны денеге салу үлкен күнә саналады. Осыған байланысты Қазақстан мұсылмандары діни басқармасының Ғұламалар кеңесі мәлімдеме жасады.

Ғұламалар татудың харам екеніне бірауыздан келіскен.

– Татуировка – тері астына бояуыштарды ендіру жолымен салынатын адам денесіндегі сурет. Ғұламалар оның харам екеніне бірауыздан келісті. Ол – үлкен күнә. Өйткені ол Алланың жаратылысын өзгерту, көзбояушылық, қанның араласуы себепті нәжіс бояумен бояу, денеге зиян беру болып саналады, – делінген мәліметте.

Ғұламалар кеңесі денеге сурет салуға тыйым салынғанын және мүмкіндік болса оны кетіру керек екенін айтты.

– Денеге татуировка салу – харам, үлкен күнә. Тәубе етіп, мүмкіндік болса, оны кетіруі керек. Татуировканы кетіру денсаулыққа зиян болса, амалсыз қалады. Ол дәретке, намазға және имамдыққа кедергі болмайды, – деп қосты кеңес.