ҚР Ұлттық академиялық кітапханасында «Тарихтан тағылым» атты иллюстративті кітап көрмесі өз жұмысын бастады.  Жылдың басында дәстүрлі ұйымдыстырылатын көрмеге биыл еліміз бойынша және ЮНЕСКО көлемінде мерейтойлары аталып өтетін тарихи тұлғалар мен ақын-жазушылардың, қазақтан шыққан белгілі мемлекет және қоғам қайраткелерінің  архив шежірелері, құжаттары, фотолары, еңбектері, кітаптары мен құнды туындылары қойылды. 

Көрменің мақсаты – өскелең ұрпаққа қазақтан шыққан белгілі тұлғаларды, олардың тағылым жолын, туындыларын таныту, кітап оқу мәдениетін қалыптастыру, кітапхананың имиджін көтеру.

Биыл елімізде бірқатар айтулы шаралар жоспарланып отыр. Осыны негізге алған көрме бес бөлімнен тұрады.

Бірінші бөлім  «Қазақ хандығына – 560 жыл» деп аталады. Осыған орай, тақырыптық көрмеде 100-ден астам кітап және мерзімді басылым материалдары ұсынылған.

Екінші бөлім – «Ұлы Жеңіске – 80 жыл». Аталған бөлімде әскери тақырыпқа қатысты кітаптардан бөлек, сұрапыл соғыстан сыр шертетін құжаттар беріліп отыр.

 «Қазақстан Республикасының Конституциясына 30 жыл» тақырыбындағы үшінші және «Қазақстан халқы Ассамблеясына 30 жыл» тақырыбындағы төртінші бөлімдерде соңғы жылдары жарияланған баспа өнімдері, тың деректі материалдар қамтылған.

Бесінші, «Тұғыры биік тұлғалар»  тақырыбындағы  бөлім, жеке тұлғалардың мерейтойларына арналған. Атап айтқанда,  «Әбу Насыр Әл-Фараби - 1155 жыл»,  «Шоқан Уәлиханов - 190 жыл», «Абай Құнанбайұлы -180 жыл»,  «Міржақып Дулатұлы - 140 жыл», «Сапарғали Бегалин - 130 жыл», «Сәбит Мұқанов - 125 жыл»,  «Қанабек Байсейітов - 120 жыл»,  «Евге́ний Брусило́вский - 120 жыл», «Әбу Сәрсенбаев - 120 жыл»,  «Мұхамеджан Қаратаев - 115 жыл», «Бауыржан Момышұлы - 115 жыл», «Мәлік Ғабдуллин - 110 жыл», «Ілияс Есенберлин - 110 жыл», «Ермұқан Бекмаханов - 110 жыл», «Жұмабек Тәшенов - 110 жыл», «Жұбан Молдағалиев  - 105 жыл», «Шора Сарыбаев - 100 жыл»,  Нұрғиса Тілендиев  100 жыл, «Әнуар Әлімжанов - 95 жыл», «Шәмші Қалдаяқов - 95 жыл», «Евгений Сидоркин - 95 жыл», «Тұманбай Молдағалиев  90 жыл», «Қадыр Мырзалиев - 90 жыл», «Жұмекен Нәжімеденов - 90 жыл», «Карл Байпақов -85 жыл», «Роза Бердіғалиева  - 80 жыл», «Қуаныш Сұлтанов - 80 жыл», «Марал Хасен - 80 жыл»

Көрмеге мерейтой иелерінің өмірі мен шығармашылығы жайында жазылған 500-ден аса кітаптар, естеліктер, фото-суреттер, нақылсөздер мен дәйексөздер қойылды.

Көрме кітапхана оқырмандарына тұрақты түрде жыл бойы ұсынылады.

 Астана және қала қонақтарын таным көкжиегін кеңітіп, тағылымды көрмені тамашалауға шақырамыз!