"Ол отыра алмайды, сотқа жылап келді": Гүлмира Сатыбалдының соты кейінге қалдырылды

Бүгін  Гүлмира Сатыбалдының ісіне қатысты сот жарыссөзі жалғасуы керек еді. Алайда адвокаттары сотталушының аллергиясы ұстап, ауырып қалғанын мәлімдеді.

Сот отырысында  Гүлмира Сатыбалдының адвокаттары сотталушының әл-ауқатының нашарлығына байланысты жарыссөзді кейінге қалдыруды сұрады. Олардың айтуынша, сотталушының аллергиясы қозып кеткен.

– Оған антигистамин препараттары салынды. Қазір оның бүйрегі қатты ауырады. Демалыста болған соң дәрігер табылар емес, - деді адвокат Әсемгүл Даниалова. 

Ол сондай-ақ қорғаушылардың сот жарыссөзіне дайын екенін, бірақ сотталушының өзі бұл процеске шыдай алмайтынын, сондықтан отырысты кейінге қалдыруды сұрайтынын атап өтті. 

– Біз процесті созғымыз келіп отырған жоқ. Ол шынымен ауырады. Ол отыра алмайды, сотқа жылап келді, - деп атап өтті адвокат.