Судьяны ұрлап кеткен: күдікті іздестіріліп жатыр
«Адам ұрлау», «Бопсалау» және «Сот төрелігіне кедергі келтіру» баптары бойынша сотқа дейінгі тергеу басталды.
Астанада судьяны ұрлап, отбасын қорқытып, 300 мың теңге несие алуға мәжбүрлеген ер адам іздестіріліп жатыр.
Бұл туралы журналист Михаил Козачков жазды.
Алдын ала мәлімет бойынша, белгісіз біреу бетперде киіп, қолында қарумен судья Ордабаевқа үйінің тұрағында шабуыл жасап, оны күштеп көлікке отырғызып, белгісіз жаққа алып кеткен. Шабуылшы судьяны үлкен сома бермесе, отбасына қиындық тудыратынын айтып қорқытқан.
Ордабаев 300 мың теңгеге несие алып, ақшаны берген. Кейін қылмыскер өлтіремін деп қорқытып, тағы 12 миллион теңге және сот актісін жоюды талап еткен.
Судья полицияға хабарласты. «Адам ұрлау», «Бопсалау» және «Сот төрелігіне кедергі келтіру» баптары бойынша сотқа дейінгі тергеу басталды.