Аргентина құрамасы Америка кубогы финалына жолдама алды

Аргентиналық футболшылар жартылай финалда Канадамен шеберлік байқасты.

Кездесу барысында Лионель Месси Месси 51-минутта мергендік танытты. Бұл - атақты футболшының доп додасы барысында соққан алғашқы голы. Ол турнирде бірнеше ойын өткізгенімен қанжығасы майланған жоқ еді. 

Кездесу барысында тағы бір голды Хулиан Альварес 22-минутта өзінің еншісіне жазды.

Осылайша аргентиналық футболшылар қарсыласынан 2:0 есебімен басым түсіп, финалға жолдама алды. 

2021 жылы өткен Америка кубогында олар Бразилияны 1:0 есебімен жеңіп, чемпион атанған еді. Сол жетістігін биыл қайталауына мүмкіндік туып отыр.

Сондай-ақ 11 шілдеде Уругвай мен Колумбия шеберлік байқасады.

Биыл Америка кубогы 20 маусым мен 14 шілде аралығында АҚШ-тың 14 қаласында өткізілуде.

Америка кубогы 1916 жылдан бері тұрақты өткізіліп келеді. Қазірге дейін Аргентина мен Уругвай -16, Бразилия - 9, Парагвай, Чили, Перу - 2, Клоумбия мен Боливия - 1 мәртеден чемпион атанды.

Айта кетсек, 1/4 финалда Аргентина құрамасы Эквадорды пенальтилер сериясы арқылы жеңіп, жарыстың келесі сатысына шықты.